Mar 15 | ATA | STEP | Xe ili'i no kakau manina, la ta tatila noxi'a ta aili'i ilo'a ta tatila mo ta mitema sou lapuloto mo ta tatila sou ipotosou tu'utu'umaxu noxi'a ta mitema latala, mipita sou mipotoxu Iesu. Xe mukalu, la sou misakiinu sou milailixu noxou Pilato avolu.

a 15:1Luk 22:66

b 15:5Ais 53:7; Mak 14:61

c 15:11Apo 3:13-14

d 15:21Rom 16:13

e 15:24Lex 22:18

f 15:27‑28Ais 53:12

g 15:29Lex 22:7, 109:25; Mak 14:58

h 15:34Lex 22:1

i 15:36Lex 69:21

j 15:40Luk 8:2-3

Mark 15

Iesu Mutulu no Talaxu Pilato

(Mat 27:1-2, 11-14; Luk 23:1-5; Ioa 18:28-38)

1 ^aXe ili'i no kakau manina, la ta tatila noxi'a ta aili'i ilo'a ta tatila mo ta mitema sou lapuloto mo ta tatila sou ipotosou tu'utu'umaxu noxi'a ta mitema latala, mipita sou mipotoxu Iesu. Xe mukalu, la sou misakiinu sou milailixu noxou Pilato avolu.

2 Anu Pilato mutali'isou Iesu aloxo 'o, “Nini tatananu tuala noxi'a ta Iutaia ne?”

La anu mukolinu vaikalau aloxo 'o, “Ani, anu aloxo nini nelemolu ne.”

3 Ta tatila noxi'a ta aili'i milomu aloxo ne, la mileanu vaikala tavu'alo mulai noxou Iesu. 4 La Pilato mutali'isou la aloxo 'o, “Loxovaa, la nini nakoli vaikala vile ua 'o? Nini nelomusou lexe ane'i mileanu vaikala tavu'alo mune'e noxine.”

5 ^bIa Iesu ukolinu vaikala vile la uasi. Anu aloxo ne, la sou Pilato mukuluke no anu.

6 Io, no voxo tila ane ne, la Pilato ulavusou sou ululusou itema vile uxolu no nano no taasou navunavu. Ta mitema me'asi ilavusou isosovosou itema vile. 7 No voxo ane ne, la itema vile ualasou lexe Valavasi ilo'a ta mitema se'i mixolu no taasou navunavu. Xo ane'i miavutinoxu 'oto'oto noxi'a ane'i ane isaxila'u tuala ne, la mive'a ta mitema se'i misoisoli. 8 Ioxe, ta mitema tavu'alo mixali noxou Pilato, la mitali'isouxu mii ane anu ulavusou u'oxo'oxonu tatei noxi'a.

9 Anu mukoline'i la muvikala aloxo 'o, “Ngingi ngemasaxa lexe eni alulusou tatananu tuala noxi'a ta Iutaia ulai noxinge?” 10 Muvikala aloxo ne, xo mulavu lexe ane'i ta tatila noxi'a ta aili'i, tane'i masuau Iesu misevile, la sou milailixu sou mitulusou no anu vaivaikala. 11 ^cIa ane'i miavutinoxu opone'i ta mitema sou lexe ululusou Iesu uasi, ululusou Valavasisi ulai noxi'a.

12 La sou Pilato mutali'isi'a la aloxo 'o, “Ngingi ngemasaxa lexe eni a'oxonu mii ma'ia noxou itema ane ngingi ngalemolu lexe tatananu tuala noxi'a ta Iutaia?”

13 Ane'i mikoli la mi'ava aloxo 'o, “Talilixu no ovu valautu!”

14 Anu mutali'isi'a aloxo 'o la, “Loxovaa? Anu mu'oxo susu ma'ia?”

Ia ane'i mi'ava tatila aloxo 'o, “Talilixu no ovu valautusi!”

15 Anu mululusou Valavasi mulai noxi'a, xo anu umasaxa lexe u'oxo aloxo ne sou ane'i i'osasou. Anu muvikalane'i ta mitema sou 'oto'oto lexe ane'i ipuapuasou. Mipuapuasou mukalu, la sou mu'italonu mulai no avo'a ta mitema sou 'oto'oto sou lexe ililixu no ovu valautu.

Ta Mitema sou 'Oto'oto Mimolovila'isou Iesu

(Mat 27:27-30; Ioa 19:2-3)

16 Xe ili'i, la ane'i ta mitema sou 'oto'oto milailixu Iesu mu'unalai no nano no vimelusou taasou itema sou xaixai noxou tatananu tuala ne Romu. La ane'i mi'avali'a ta mitema sou 'oto'oto latala mine'e mipita. 17 Ane'i mine'e mipita mukalu, la mitaanu tokolomo lauoinu noxou xe mipalipaxoxonu savovolu ka mimuxaxu no kisou loxo kisivalu sou sosovo lexe Anu tatananu tuala vile ane. 18 Ane'i mi'oxonu aloxo ne xe mukalu, la sou mivikalanu aloxo 'o, “Anu ane, tatananu tuala noxi'a ta Iutaia!” 19 Xe mivavau kisou no anu lukae xe mituvetuvesou xe mitangatangatulu mulu'elai no lia sou mi'itinu ualasou. 20 Ane'i mimolovila'isou aloxo ne xe mukalu, la sou ane'i mixexeenu tokolomo lauolauoinu noxou. Ia mimulaxu tokolomoxu vaxa la. La sou milailixu sou lexe ililixu no ovu valautu.

Mililixu Iesu no Ovu Valautu

(Mat 27:31-44; Luk 23:27-43; Ioa 19:17-27)

21 ^dItema vile ualasou lexe Saimoni, tualasou ne Kilene, anu Alekisanda ilou Rupusi mami'a. Anu molu no tuala vile 'alai ne Ielusalemu, ia mune'e mupolopepeene'i sou lexe u'unalai no tuala tila. Ane'i ta mitema sou 'oto'oto mimaisou, la mivikala pekia'u noxou lexe anu utavulenu ovu valautu noxou Iesu. 22 Ane'i mino'u Iesu sou milailixu no tuala ilemo lexe Xoluxata. Uala ane ne, laaxu lexe tuala sou ta mitema xavanane'i. 23 Ane'i milosou Iesu uaini ane mixiunu ilou lamalasile sou uxamuli navunavu uasi. Ia Anu uiexu uasi. 24 ^eXe ili'i, la sou mililixu Iesu no ovu valautu. Ane'i mimila'anu tokolomou Iesu noxi'a vilevilesi. Ia ane'i mi'oxonu vila'i vile sou misosovosou lexe 'ei ane uno'u mii ma'ia ma'ia.

25 Ane'i mililixu Iesu no ovu valautu, la anu aso iou muxatele tami'a no kakau. 26 Vaikala e anu mususu no anu ne, ane'i mikaukavunu no pa'umolu aloxo 'o, “Tatananu Tuala Noxi'a Ta Iutaia Ane.” 27 ^fAne'i mililixa'a ta mitema tamei sou pakali no pa'umolu kalumo. Mililixu vile no avo tema xe vile mililixu no avo ae. 29 ^gTa mitema mimuamua'i xe mipolopepeenu la milulu kisi'a sou mimolovila'isou la mivikala aloxo 'o, “Ae, nini namitema sou namamulonu tani tila noxou Lataua ka natulusou ulivu no voxo tatalusi ane. 30 Ioxe nini nalu'e no ovu valautu mo nini mene napamaulineni la.”

31 Ta tatila noxi'a ta aili'i ilo'a ta mitema sou lapuloto kalumo mimolovila'isou mo mivikala ngatongato'o noxi'a aloxo 'o, “Anu mupamauline'i ta mitema va'axa'a, ia Anu umomomo sou upamaulinu uasi. 32 Lexe nini Kalisito, tatananu tuala ne Isilaeli, la ane 'alalae 'osi naxexee no anu ovu valautu mo nalu'e, mo sou nexi tamaisine, la sou tamuxamuxaxu tanexi ulai noxine.” Ta mitema tamei ane'i mililixa'a no pa'umolu ne, ilou mimolovila'isou kalumo.

Iesu Musoli

(Mat 27:45-56; Luk 23:44-49; Ioa 19:28-30)

33 Aso mukulupa, la isivoxo mutaasou xalexalee tuatuala mukalusi, mole aso iou tatalu no 'olo'olovoxo. 34 ^hIo, aso iou tatalu mukalu, la sou Iesu mu'ava tatila aloxo 'o, “Eloi, Eloi, lama savakatani?” Laaxu lexe, “Lataua noxilo, Lataua noxilo, loxovaa la nini nesu'aleli 'o?”

35 Ta mitema se'i mitulutulu 'alai noxou ne, la milomusou vaikala ane ne, la mivikala aloxo 'o, “Ngalomu, Anu a u'avalou Eliasi.”

36 ⁱIoxe, itema vile muiave mulai la muno'u kateni sou mutaa mulu'elai no uaini sixula. Xe mukalu, la mutotole vaxa no lukae telexu sou muienu no anu. Ia anu muvikala aloxo 'o, “Taxolu o, mo tamaisou. Eliasi une'e sou uno'u ulu'enu no lia male.”

37 Ia Iesu muunga tatila mukalu, la sou Anu musoli.

38 Iesu musoli, la lavalava e mulili no nano no tani tila noxou Lataua ne, mukakaa tamomolu teitexi mulai mupee no lia. 39 Itema tila sou uulaxune'i ta mitema itemaxu ta'uve sou 'oto'oto ne, mutulu no talaxu Iesu. Anu mulolomusou Iesu mine muunga mo mumaisou mine musoli. La sou anu muvikala lexe, “Manina musuku, itema ane ne Anu Lataua 'Olu ane.”

40 ^jIa ta sema se'i a itutulu va'axu sevile sou imamalei. Vile noxi'a ane Malia sie Maxatale, xe Malia ane Iakovo kitu'a ilou Iosesi neni'a mo Salome kalumo. 41 Iesu muxoxolu ne Xalilaia, la ane'i mimulimulinu sou misu'ulinu. Ta sema tavu'alo ilo'a Iesu minuna ne Ielusalemu ne, ane'i a itutulu kalumo.

Iosepu Mu'asixu Iesu

(Mat 27:57-61; Luk 23:50-56; Ioa 19:38-42)

42 Voxo ane ne, anu voxo sou lalaxi sou Voxo Tavuna. Mo anu a 'alai sou 'olovoxo. 43 La sou Iosepu sie Alimatia, anu u'ume uasi, mulai noxou Pilato sou mulingau Iesu vasimolu. Anu ne, ta mitema itoxonu xo itema vile noxi'a ta tatila sou ipotosou tu'utu'umaxu noxi'a ta mitema xe anu itema vile sou uxomaiou saxisaxila'u noxou Lataua sou une'e kalumo. 44 Pilato mukuluke xo mulomusou lexe Iesu 'a musoli palea ne. La sou anu mu'avalou itema tila sou uulaxune'i ta mitema itemaxu ta'uve sou 'oto'oto sou mutali'isou aloxo 'o, “Iesu 'a musoli io, uasi uao?” 45 Itema ne muvikalanu mukalu, la sou Pilato mu'italonu Iesu vasimolu mulai noxou Iosepu. 46 La sou Iosepu mulai muloto lavalava vile maenaxu sou mune'e muno'u Iesu vasimolu mulu'e sou mukupoonu no anu. Mukupoonu mukalu, la sou muno'u vasimolu mulailixu no lulu vile. Lulu ne, mi'asou no tava'u maea. Xe mukalu, la sou mupipalo'u lavo'o tatila mune'e mutaloxu lulu anaxu no anu. 47 Malia sie Maxatale ilee Malia ane Iosesi nenu a itutulu imamalei mo mimaisou tuala e mumulaxu Iesu vasimolu no anu.